Supsidio di proyekto pa traduktor literario

Komo prinsipiante, bo por apliká solamente ora bo tin un kontrato modelo (òf plan di publikashon). Traduktor eksperensiá por apliká ku un deklarashon di intenshon tambe. Esei ta un karta òf e-mail di e editor ku ta indiká ku ta trahando un kontrato modelo pa e tradukshon en kuestion. Pa mayoria editor, esaki ta un konsepto i ruta konosí. Den e deklarashon di intenshon ei, mester inkluí e largura di e teksto i fecha di entrega di e tradukshon tambe. Despues bo ta manda e kontrato modelo firmá via e-mail (komo pdf òf kopia) pa e fondo. Tene na kuenta: e fondo ta spera e kontrato promé ku e desishon riba bo aplikashon. Hopi bia, esaki ta nifiká ku bo mester manda e kontrato no mas lat ku dies siman despues di bo aplikashon.

Pa poesia ta apliká un otro honorario (basá riba liña i/òf poema pa tradusí) for di esun pa prosa. Anualmente, e asosiashon di outor konosí komo Auteursbond i e grupo di editor literario konosí komo Literaire Uitgeversgroep (parti di Mediafederatie) ta hasi palabrashon tokante tarifa stándart, i por duna bo mas informashon di esaki.

Den kaso eksepshonal, por sera un kontrato ku ta desviá di esaki pa un tradukshon di poesia supstansial. Esaki mester ta relashoná ku tradukshon di poesia pa kua eksplotashon di e publikashon ta imposibel si sigui e tarifa mínimo, i pa kua e editor no tin otro posibilidat pa supsidio (manera supsidio di produkshon di fondo òf organisashon di afó) pa e publikashon. Ora ta trata di kaso eksepshonal asina, semper ta mihó pa tuma kontakto di antemano ku un di e spesialistanan di supsidio di e fondo; pa tende tambe kiko e mínimo eksigensianan di honorario ta ku un kontrato mester kumpli kuné. Tene na kuenta ku si e honorario di e editor ta otro, e supsidio di Letterenfonds tambe ta apliká un otro tarifa.

Sí, tradukshon di no-fikshon ku un karakter literario i/òf di importansia kultural-históriko, filosófiko, kultural-polítiko, òf sosial ta bini na remarke pa supsidio. Fuera di esei, ta wak tambe kiko e teksto ta agregá na e oferta di obra hulandes eksistente. Teksto ku un karakter muchu spesialista, edukativo, òf informativo manera estudio, obra di referensia òf obra ku ta duna bista general ta kai pafó di e areglo akí (i di e área di Letterenfonds). 

Sí, esei por. Den e kaso ei, ta importante pa bo menshoná den bo aplikashon ta kua edishon di e teksto original bo ta usa. Ademas, nos ta pidi pa elaborá riba e balor agregá di e tradukshon nobo. Nos ta prinsipalmente interesá den bo vishon riba tradukshon di e buki i bo aserkamentu: kon bo ta bai manehá e trabou, kiko ta karakterístika importante di e teksto original ku, segun abo, mester bini bèk den e tradukshon? No ta nesesario pa bo inkluí e tradukshon(nan) anterior. E komishon di konseho ta evaluá si un tradukshon nobo ta deseabel. E ta tene kuenta ku disponibilidat i tempu di eksistensia di e tradukshon(nan) anterior, i ku kalidat di esei(nan). E komishon di konseho ta hasi rekomendashon i tuma desishon separá riba kada proposishon pa un re-tradukshon basá riba e kriterionan menshoná promé, tambe si e tradukshon ta parti di un seri.

Si bo sigui apliká komo prinsipiante, e tempu di espera pa trata e aplikashon lo ta ménos, kual lo pone ku bo lo risibí e supsidio mas lihé. Tene kuenta sí ku lo bo risibí un tarifa mas abou ku traduktor eksperensiá i ku bo ta bini na remarke solamente pa e prima (toeslag) junior-senior. 

Si bo opta pa apliká komo traduktor eksperensiá, tene kuenta ku e fondo lo laga evaluá e kalidat literario òf e interes (literario) di e buki ku lo keda tradusí tambe, huntu ku e kalidat di un tradukshon resien. Esaki ta enserá un tempu di prosesamentu mas largu, loke ta nifiká ku lo bo mester warda mas largu riba un desishon (mas informashon tokante esaki bo ta haña bou di ‘Deadline’). Komo traduktor eksperensiá lo bo risibí un tarifa mas altu, sí, i lo bo haña e posibilidat pa (banda di e prima (toeslag) junior-senior) apliká pa pago adishonal pa e nivel di difikultat altu, e prólogo òf epílogo, òf e trabounan di selekshon/redakshon. 

Bo ta traha riba e tradukshon nobo ku un otro kolega? E ora ei, boso tur dos mester entregá un aplikashon. Naturalmente, boso tur dos mester kumpli ku e kondishonnan. Riba e formulario bo ta splika e método di boso kolaborashon. Ta importante pa bo plania sufisiente tempu pa espasio pa deliberá tokante eskoho di tradukshon, i pa edishon konhunto di e tradukshon. Si bo ta traha riba un tradukshon ku vários kolega (ke men, na tur, tin tres òf mas traduktor?), bo no por entregá un aplikashon. 

Aplikante ku ta biba na Bélgika ta entregá un aplikashon na Literatuur Vlaanderen. Si bo ta biba na un otro pais, pero un editor hulandes ta publiká bo tradukshon na hulandes, bo por apliká na Letterenfonds. Aplikante for di e parti karibense di reino tambe por apliká na Letterenfonds (pa aplikashon pa tradukshon na papiamento, papiamentu, òf ingles, manera usá pa papiadó nativo di e idioma).

E tamaño di e tradukshon ta den bo kontrato: pa prosa den kantidat di palabra, pa poesia den kantidat di liña i/òf poema. Si bo ta traha huntu riba un tradukshon, e divishon di kantidat di palabra tambe ta indiká den e kontrato. Si no tin un divishon eksplísito den e kontrato, nos ta asumí un divishon di 50-50. Bo por apliká pa bo parti di e tradukshon so.

Normalmente, ora di traha un kontrato modelo pa tradukshon literario, ta tene kuenta ku e kantidat di palabra di e teksto original pa determiná e tarifa di tradukshon. Pero den kaso di idioma ku ta masha diferente for di hulandes, no semper esaki ta hustu; por ehèmpel, den kaso di idioma skirbí den karakter (chines, hapones), òf lenga aglutinante, ke men lenga ku palabra largu ku un base sigui a diferente morfema (húngaro, turko). Den e kaso ei, ta usual pa determiná e kantidat di palabra den e kontrato a base di e largura (premirá) di e teksto tradusí na hulandes, i no segun e kantidat di palabra di e teksto original. Tene kuenta ku esaki ora di traha bo kontrato. Asosiashon di outor, Auteursbond por duna guia general pa diferente idioma. 

Pa bo aplikashon, ta importante tambe pa sa ku desishon positivo ta basá riba e kantidat di palabra (òf: liña/poema) den e kontrato di tradukshon. Despues, no por kambia òf ahustá esaki mas; ke men asina bo sa e kantidat di palabra definitivo, indiká esaki.

Den bo motivashon, bo ta introdusí e outor brevemente, i ta enfoká spesialmente riba e kalidatnan literario di e buki. Bo no tin mester di konta e plòt ni e kontenido. Ta importante pa bo duna bista riba e karakterístikanan narativo i estilístiko di e teksto en konekshon ku e temanan di e buki. Pa e komishon di konseho ta importante pa e motivashon duna un bista kla di e teksto original i di e impreshon ku bo a forma di e obra akí komo traduktor.

Den kaso di outor ménos konosí, mester di mas aklarashon ku den kaso di un título klásiko, pero no asumí ku tur hende konosé e obra. Bo motivashon ta konsistí di un máksimo di mil palabra. 

Si bo ta apliká pa un obra di no-fikshon, bo por elaborá riba e karakter literario òf importansia kultural di e obra (kaminda ta relevante: pa e lesadó di abla hulandes) ku mas profundidat den bo motivashon. Karakterístika literario ta, por ehèmpel, uso di medio literario (pensa riba figura di estilo, e eskoho pa un perspektiva), uso di prosedimentu retóriko, e kompromiso òf vishon personal di e outor, e eskoho pa un ángulo i tema original, un aserkamentu òf struktura inventivo. 

Si e tradukshon ku bo ta trahando riba dje ta eksepshonalmente difísil, komo traduktor eksperensiá bo por pidi un pago adishonal tambe banda di e supsidio básiko. Den e kaso ei, nos ta pidi bo pa un motivashon adishonal / èkstra splikashon. Komo ku por ta difísil pa kalkulá difikultat di e tradukshon ora bo kaba di kuminsá, bo tin te seis siman despues di e deadline di e periodo di aplikashon pa apliká pa èkstra kompensashon i pa duna bo motivashon. Un pago adishonal ta oumentá e montante di beka standart ku 15 òf 30 porshento. Importante: bo ta risibí un pago adishonal solamente si ta abo mes a apliká pa esaki. 
 
Idealmente, un motivashon pa un pago adishonal pa kompensashon di difikultat ta konsistí di dos parti: un fragmento tradusí i e fragmento for di e teksto original ku ta kompañá esaki (huntu 1 pa 2 página), i banda di esei un splikashon di e eskohonan di tradukshon hasí i e problemanan ku bo a topa. Den esei, bo por marka ehèmpel di difikultat di e fragmento tradusí i agregá komentario. Bo por skohe tambe pa no selektá un fragmento so, sino pa menshoná e problemanan di tradukshon punto pa punto, i na kada punto, sita ehèmpel di un frase / ehèmpel kòrtiku di un fragmento (teksto original + tradukshon (provishonal)). 

Pa determiná e problemanan di tradukshon lo bo por usa e checklist akí: 

• E struktura di frase ta rekerí pa e traduktor ta masha inventivo? 

• E teksto ta kontené konsepto klave ku ta difísil pa tradusí?

• E teksto ta kontené hopi diferente género? 

• E teksto ta kontené diferensia di registro grandi òf sutil, dialekto, òf idioma inventá? 

• Ta usa hopi efekto di zonido? 

• E teksto ta kontené realia, ke men palabra òf ekspreshon ku ta referí na elemento kultural spesífiko ku ta típiko pa e pais di e idioma fuente, òf referensia ku ta rekerí investigashon adishonal òf un adaptashon inventivo? 

E karakterístikanan di teksto akí no ta hasi un tradukshon eksepshonalmente difísil pa definishon. Ora di determiná e nivel di difikultat, e komishon di konseho ta konsiderá tambe e frekuensia, komplehidat, i diversidat di e problemanan di tradukshon, i ta tene kuenta ku diferensia lingwístiko i e distansia entre e kultura di orígen i meta. 

Komo traduktor eksperensiá, bo por risibí un pago adishonal pa skirbi un prólogo òf epílogo, si e editor ta paga un tarifa adishonal pa esei tambe. E tarifa ei pa e prólogo i epílogo mester ta inkluí den bo kontrato di tradukshon. Kualke pago adishonal ta suma na 150% di e tarifa di e editor. Letterenfonds ta mira un prólogo òf epílogo komo balor agregá: e ta ofresé traduktor literario e oportunidat pa profilá nan trabou, eskoho, i eksperensia.

Si bo ta kompilá un antologia, tradusí un teksto (mas bieu) ku ta rekerí komentario (òf nota na pia di página), òf mester hasi un selekshon for di vários teksto, bo por apliká tambe pa un pago adishonal di selekshon/edishon komo un traduktor eksperensiá.

E pago adishonal ei ta destiná komo kompensashon pa e invershon di tempu èkstra ku e trabounan di selekshon/edishon ta rekerí di bo, i ta oumentá e montante di supsidio standart ku 30%. Si ta trata di trabou di edishon, nos ta pidi bo pa indiká di ki forma esaki lo tuma, i kuantu tempu èkstra bo mester pa esei (banda di e trabou di tradukshon usual). Anotashon tambe ta kai bou di trabou di edishon: si bo hasi anotashon, indiká si bo ta kopiando nota eksistente, si bo ta modifikando nan parsialmente, òf si ta bo mes ta agregando nan. 

Si bo hasi un selekshon, splika bo eskoho, deskribí bo aserkamentu, i duna un indikashon di e tempu èkstra enbolbí tambe. 

Letterenfonds ta un órgano atministrativo independiente i ta kai bou di e lei general di derecho atministrativo. Esei ke men ku si un aplikante no ta di akuerdo ku un desishon, e por entregá un opheshon. E periodo pa un aplikante entregá un opheshon ta seis siman, kuminsando for di e dia ku a anunsiá e desishon. Despues ku e periodo menshoná vense, no ta posibel mas pa entregá un bezwaarschrift, esta, un karta di opheshon. Lesa mas tokante opheshon (bezwaren).

Normalmente ta paga supsidio mesora, en todo kaso denter di ocho siman. Si bo ke risibí e montante di supsidio den kuota (den dos parti), bo por indiká esaki riba e formulario di aplikashon. Esaki ta posibel solamente si e di dos aña tambe bo ta trahando ainda riba e tradukshon.

E otorgashonnan ta publiká bou di Otorgashon (Toekenningen) na e parti hulandes di e website akí, den e boletin digital, i den e kuenta anual di Letterenfonds, wak Publikashon (Publicaties) riba e website akí.

Na Letterenfonds tambe bo por apliká pa un ontwikkelbeurs, esta un beka pa desaroyo. Beka di desaroyo ta pa traduktor prinsipiante i eksperensiá. Riba e página di supsidio bo ta haña mas informashon tokante esaki. Na e sentro di ekspertisio den tradukshon literario, esta Expertisecentrum Literair Vertalen, bo ta haña un bista di tur opshon pa aplikashon ku tin na Hulanda i Vlaanderen. 

Letterenfonds ta sali for di e punto di bista ku un traduktor por tradusí un máksimo di 200.000 palabra pa aña. Manera ta menshoná mas ariba, lo no prosesá bo aplikashon si bo ta tradusí 40.000 palabra òf mas pa luna.