Revistanan literario

Revistanan literario di bon kalidat ta yuda talento konosí i deskonosí pa avansá nan karera. Un santuario kaminda talento por desaroyá i ideanan nobo ta haña tur espasio. Ademas, nan ta ofresé redaktornan e posibilidat pa perfekshoná nan abilidatnan (redakshonal) i pa presentá nan mes na públiko i spesífikamente na e fishi di buki. Revistanan no solamente ta reflekshoná e susesonan den sosiedat, sino nan ta influensiá nos bista riba literatura i mundu tambe.

Pa duna revistanan literario espasio pa sigui desaroyá i profeshonalisá, ta importante pa ofresé nan trankilidat i seguridat finansiero pa un término largu. P'esei, e término pa kua por solisitá supsidio ta keda kuater aña, meskos ku na 2021-2024. Ademas, a oumentá e montante di supsidio pa revista di € 15.000 pa € 20.500 pa aña. P'esei a agregá bùdjèt adishonal na e posibilidatnan – inisialmente mas limitá – pa 2025-2028. E bùdjèt adishonal ta bini for di e rekursonan fair pay ku Ministerio di OCW a hasi disponibel pa e Fondo di Kultura den Reino, institushonnan BIS [Infrastruktura Base Kultural] i museo ku ta kai bou di Lei di Patrimonio. Pa e motibu ei, pa promé biaha Letterenfonds ta pidi e revistanan pa tene nan mes na e siguiente tarifanan mínimo pa honorarionan di outornan i ilustradónan. Esakinan ta montantenan mínimo apsoluto, i e fondo ta invitá e revistanan pa oumentá nan (si ta posibel):

• Prosa original: 10 sèn pa palabra

• Poesia original: € 75 pa poema

• Prosa tradusí: 7,5 sèn pa palabra

• Poesia tradusí: € 55 pa poema

• Ilustrashon: € 75 pa ilustrashon (kategoria nobo)

Pa fortalesé e posishon di e revistanan den e kampo literario, Letterenfonds ta pidi esnan ku ta risibí supsidio pa sigui kontribuí na e formashon di, i pa partisipá aktivamente den un kolaborashon den henter e sektor pa revistanan literario, siguiendo e ehèmpel di VLAM21. Na 2025, Letterenfonds lo inisiá esaki.

Ta spera di e redakshonnan ku nan ta apliká e Fair Practice Code i e Governance Code Cultuur i ta deskribí kon nan ta relashoná ku e Code Diversiteit en Inclusie (Kódigo di Diversidat i Inklushon). Den e marko aki, e fondo ta suponé ku tin ambishon kresiente, adekuá pa e situashon den kua e revistanan ta funshoná.

Durante kuater aña, Letterenfonds lo tene kòmbersashonnan di monitoreo ku e revistanan, tokante di e progreso i e realisashon di e metanan ku a formulá pa 2025-2028.

• Revistanan literario (na hulandes, papiamentu, papiamento òf fries) ku ta persona hurídiko establesé den Reino hulandes i ku no tin fin di ganashi.

• Ta ekskluí revistanan ku enfoke demasiado limitá di e solisitutnan, meskos ku revistanan spesialisá, sientífiko i di membresia, ku eksepshon di revistanan pa e práktika profeshonal di tradukshon literario.

• A publiká e revista for di 1 di mart 2023 sin interupshon, ku un tamaño di komo mínimo 48 página pa aña kalendario i un frekuensia di publikashon di dos biaha pa aña (pa revistanan físiko) òf komo mínimo kuarenta obra literario nobo pa aña i un skema di publikashon regular (pa revistanan digital).

• Tin por lo ménos un partido mas ku ta aktuá komo kofinansiadó, Letterenfonds no por ta e úniko invershonista.

• E revista tin un redakshon profeshonal ku ta konsistí di vários persona. E redakshon ta sòru pa atkisishon i selekshon di e artíkulonan, i ta revisá i koregí tur artíkulo ku lo publiká.

• Por lo ménos mitar di e kontribushonnan publiká ta di índole literario, i e kontribushonnan no ta skirbí prinsipalmente pa e miembronan di redakshon.

• Ta otorgá e kontribushonnan den un ròndu, i nan ta kubri kuater aña. Un revista ta risibí € 82.000, es desir: € 20.500 pa aña.

• Por usa un máksimo di 50% di e supsidio pa kubri otro gastunan pa e revista ku no ta e kompensashon pa outornan, ilustradónan i redakshon.

Un komishon di konseho lo evaluá bo solisitut. E komishon tin miembronan di Hunta di Konseho i ekspertonan eksterno. E meta ta pa anunsiá e desishon di supsidio promé ku fin di aña, i pa mas tardá 22 siman despues di a risibí e solisitut.

E komishon di konseho ta evaluá e solisitutnan a base di e siguiente puntonan:

• e kalidat literario di e revista;

• e plannan redakshonal, e alkanse di públiko i e vishon pa futuro;

• e kalidat i grado di realidat di e eksplotashon.

Ora di inisiá bo solisitut, ta pidi bo pa yena bo datonan i pa upload e aneksonan nesesario. Un anekso importante ta e formulario di solisitut yená. Bo ta haña e formulario aki na e parti abou di e página aki. E fondo solamente ta tramitá solisitutnan kompleto. Si bin resultá ku tòg e solisitut ta inkompleto, denter di dos siman bo por manda e informashon ku ta falta. Si e ora ei e solisitut ta inkompleto ainda, ta rechasá esaki formalmente.

Den kaso di un desishon positivo, ta paga mitar di e montante total di supsidio otorgá denter di kuater siman despues di e desishon por eskrito.

• Ta rekomendabel pa lesa e areglo i e formulario di solisitut ku atenshon di antemano (konsultá e downloadnan aki bou). Den esakinan bo ta lesa ku ki kondishonnan bo mester kumpli i kon pa hustifiká e supsidio despues. Tambe bo por lesa kiko e komishon ta tene kuenta kuné ora di evaluá bo solisitut.

• Paga tinu: lo no prosesá solisitutnan ku no ta redaktá segun e formularionan, òf ku ta inkompleto.