Interkambionan literario

Pa proyektonan ku ta sòru pa nos por kompartí konosementu i por lanta bon kolaborashon entre diferente lugánan kaminda ta papia hulandes (Hulanda, Flándes, Sürnam, Aruba, Boneiru, Kòrsou, Saba, Sint Eustatius i Sint Maarten).

Bo por solisitá e supsidio aki komo organisashon òf kreadó literario ora bo tin plannan pa inisiá proyektonan pa promoshon di lektura i proyektonan literario. E inisiativanan aki mester stimulá interkambionan literario entre e diferente partinan di e área di idioma hulandes. 

Bo por solisitá supsidio den dos kategoria:

Kategoria A

Bo ta outor, poeta (di performance), artista spoken word/slam, traduktor, ilustradó òf programadó/kuradó literario i bo ke eksplorá bo oportunidatnan artístiko òf profeshonal den otro region di abla hulandes? Òf bo ke lanta un kolaborashon nobo? E ora ei, bo por solisitá un supsidio te máksimo € 2.500.

Kategoria B

Komo organisashon òf kolektivo, bo ta aktivo den e área literario i bo ke lanta un kolaborashon internashonal den e área di idioma hulandes? Bo ta hasi esaki a base di un proyekto literario dediká na e interkambio di konosementu i ekspertisio entre e diferente region di nos área di idioma? E ora ei, bo por solisitá un supsidio te máksimo € 10.000.

Por solisitá e supsidio serka Literatuur Vlaanderen.

Aplikantenan den kategoria A por solisitá supsidio kualke momentu di aña. E fecha límite semper ta e promé dia di luna.

Aplikantenan den kategoria B por solisitá supsidio pa un interkambio literario dos biaha pa aña.

• 1 di aprel 2026: fecha límite pa proyektonan ku ta kuminsá òf tuma lugá for di mei 2026

• 1 di sèptèmber 2026: fecha límite pa proyektonan ku ta kuminsá òf tuma lugá for di novèmber 2026