Bekanan di desaroyo pa kreadónan literario
Bo ta outor, kreadó di imágen òf ilustradó nobato òf avansá? E ora ei, bo por bini na remarke pa e Beka di desaroyo pa kreadónan literario. E supsidio aki ta destiná na edukashon, coaching, guia òf redakshon. Òf pa un kontribushon na e gastunan di biahe i alohamentu ku bo tin ku paga pa edukashon òf investigashon lokal òf den eksterior. Di e manera aki, Letterenfonds ke stimulá desaroyo di talento i profeshonal di kreadónan literario.
Pa kiko?
E supsidio ta destiná na kontribushon na e gastunan pa edukashon, coaching, guia i redakshon, òf na e gastunan di biahe i alohamentu pa edukashon òf investigashon lokal òf den eksterior. Bo no por usa e beka di desaroyo pa finansiá un estudio di outor hbo òf universitario, fultaim ni partaim, ni pa gastunan di bida òf rekursonan elektróniko manera lèptop. Paga tinu, e aktividatnan den e plan di desaroyo mester tuma lugá den futuro.
Tene kuenta ku pa tumamentu di desishon tokante di e solisitut, Letterenfonds tin un término di desishon di máksimo 8 siman.
Ken ta bini na remarke?
Bo ta kreadó literario avansá? E ora ei, bo ta bini na remarke si den e último dos aña bo a risibí un supsidio di proyekto pa skirbi un buki. Pa supsidio di proyekto risibí bo por risibí un beka di desaroyo un biaha so.
Bo ta kreadó literario nobato? Bo ta bini na remarke solamente si bo no a publiká bo debut ainda, i si bo kumpli ku por lo ménos un di e siguiente kondishonnan:
den e último dos aña, bo a sera un kontrato ku un editor ku por lo ménos ta kumpli ku e rekisitonan di e Kontrato Modelo. Òf bo a risibí un deklarashon di intenshon firmá, den kua e editor ta pronunsiá e intenshon pa publiká bo debut, komo mínimo segun e kondishonnan di e Kontrato Modelo;
bo a finalisá un estudio di outor hbo òf universitario 1 te 3 aña pasá;
den e último dos aña, bo tabata riba programashon di un manifestashon/festival literario òf aktividat literario edukativo, ku a risibí supsidio di Nederlands Letterenfonds. Durante bo aktuashon bo a presentá un obra propio ku tabata skirbí pa gran parti na hulandes, papiamentu, papiamento òf fries;
den e último dos añanan bo a publiká den un revista literario ku a risibí supsidio di Letterenfonds;
den e último dos añanan bo a partisipá den un trayekto di desaroyo di talento di Letterenfonds;
no mas ku dos aña pasá bo a risibí supsidio a base di e areglo Kreadónan pafó di e buki di Letterenfonds:
no mas ku dos aña pasá bo a risibí supsidio a base di e areglo Literatuur Caribe.
Bo por risibí un Beka di desaroyo pa kreadónan literario nobato un biaha so.
Kuantu?
Bo por solisitá pa mínimo € 500 i máksimo € 2.500. Bo ta supstansiá e montante ku un presupuesto.
Kon ta evaluá e solisitutnan?
Ta evaluá tur proposishon segun e órden ku nan a drenta, a base di e siguiente puntonan:
e kalidat di e plan di desaroyo;
e grado di realidat di e presupuesto.
E gastunan den bo presupuesto mester ta rasonabelmente relashoná na e aktividatnan pa kua bo ta hasi e solisitut. Aspektonan manera durabilidat i funshonalidat por hunga un ròl den e evaluashon.
Kon pa solisitá?
Bo por solisitá na tur momento, atraves di e boton 'Inisiá bo solisitut' na e parti ariba di e página aki. Durante bo solisitut, bo mester upload algun anekso. Bo no por warda e solisitut miéntras bo no a finalis'é, pues buska e aneksonan delantá. Un solisitut kompleto ta konsistí di:
e formulario di solisitut digital, alkansabel via 'Inisiá bo solisitut';
un plan di desaroyo redaktá segun e modelo riba e página aki
un presupuesto;
si ta aplikabel: un reflekshon riba e manera ku un beka di desaroyo ku bo a risibí anteriormente a kontribuí na e desaroyo profeshonal propio.
